Thursday, March 1, 2012

බීලා ගිහින්

කට්ටිය මධුවිත එහෙම පදමට සප්පායම් වෙලා වාහන එලවනවනේ, ඕං ඒක නම් හොඳ පුරුද්දක් නෙවෙයි. මේකත් ඔයවගේම බීල වාහන එලවන්න ගිය හාදයෙකුට ලැබිච්ච අත්දැකීමක්.

සිකුරාදා දවසක සාදයක් ඉවර වෙලා අපේ කතානායකයා වාහනය එලවගෙන ගෙදර යනවා. පොඩ්ඩක් විතර මධුවිත එහෙම සප්පායම් වෙලත් හිටපු නිසා පොලීසිය මඟ ඉඳීදෝ කියල සැකයෙන් වාහනේ එලවගෙන යනකොට මෙයාගෙ කරුමෙටම පොලිසියෙන් නැවත්තුවා. බීල කියලත් සුවඳින්ම මාට්ටු. පිංසෙන්ඩු වුනත්, මොන මොන උපාය දැම්මත් වැඩක් උනේ නෑ. රාහාමි මෙයාව එක්කගෙන ගියා පොලිස් ස්ථානෙට.


බීලද කියලා හරියටම දැනගන්න පොලිසියෙන්  Breathalyzer Test එකක් කරනවා. ලංකාවෙ පොලිසිය සුලභව භාවිතා කරන්නෙ මේ සඳහාම නිපදවපු බැලුන් විශේෂයක්. සැකකරුට මේ බැලුමක් පුම්බන්න දෙනවා, ප්‍රශ්වාස වාතයේ තියෙන ඇල්කොහොල් ප්‍රමාණය වැඩිනම් බැලුමේ පාට වෙනස් වෙනවා. ඒ අනුව සැකකරුට විරුද්ධව සාක්ශි ගොඩනැඟෙනවා. මේ ටෙස්ට් එක කරන්නෙ පොලිස් ස්ථානෙකදි විතරයි. පොලිස් රළහමිලාට ඔය බැලුන් උස්සගෙන එහෙ මෙහෙ රාජකාරි කරන්න යන්න බැහැනෙ. ඉතින් අපේ කතානායකවත් පොලිසියට ගෙනැල්ල තියෙන්නෙ මේ පරීක්ෂණය කරන්න.

පොලිස් ස්ථානෙ බීල රිය පදවල අහුවෙච්ච පිරිස ගොඩක් ගෙනැත් ඉඳල තියෙනව. එක එකා නොයෙක් නොයෙක් දහංගැට, වංගු, ජල්තර දානවා ශේප් වෙලා මාරු වෙන්න. අපේ කතානායකයත් හොල්මන් වෙලා බලා ඉන්නවා මොනවද මේ වෙන්නෙ කියල. දැන් බීල කියලා සැක කරන කට්ටියට පොලිසියෙන් බැලුම් පුම්බන්න දෙනවා. බීපු කට්ටිය බැලුම පුම්බන්නෙ නැතුව ඉන්න ෆුල් ගේමක් දෙනවා. ඇයි, බැලුම පිම්බුව ගමන් බිව්වා කියලා සාක්ශි ඇතුව ණඩු දාන නිසා.

ඔන්න බීපු එක්කෙනෙක් ඉන්නවා, බීපු ප්‍රමානෙට වැඩිය ඩෝප් කියල පෙන්නන. රාළහමිලා මෙයාට බැලුම පුම්බන්න දුන්නත් මෙයාට කොච්චර ඩෝප්ද කියනවා නම් මෙයාට බැලුමට හුලන් පිඹින්න වත් බැහැ. හිටගෙන ඉන්නත් බැරි තරම් ඩෝප් නිසා මේ මනුස්සයාව පුටුවක වාඩි කරවලා බැලුම අතට දෙනවා, ඒත් මොන බැලුම්ද? මිනිහගෙ කණ සාක්කුවෙ, ඔලුව උස්සන්නවත් බැහැ. වැඩේ හරියන්නෙ නැති නිසා රාළහමිලා බැලුම අරන් කටෙත් එබුවා. ඒත් වැඩක් නෑ. බැලුම මිනිහගෙ කටෙන් බිමට වැටෙනවා. "ඔන්න ඔහෙ ඩෝප් අඩුවෙනකන් ඉන්න දෙමු", කියල රාළහමිලා ඊලඟ සැකකරු ලඟට ගියා. රාළහමිලා එහෙට මෙහෙට උනා විතරයි අර ඩෝප් කරයා දඩි බිඩි ගාල නැඟිටල මුල්ලකට ගිහින් මොබයිල් ෆෝන් එකෙන් කාටදෝ කතා කරනවා. නියම ඩෝප් රඟපෑම.

තව බීපු එක්කෙනෙක්ව අල්ලගෙන ඇවිත් තියෙන රාළහමි බීලාද කියලා සැකකරුට සැකයි. ඉතින් මිනිහට බැලුම පුම්බන්න දුන්නම මිනිහ කියනවලු "හරි රාළහමි එකක් පිම්බුවොත් මාත් එකක් පුම්බනවා", කියලා. රාළහමිත් ඉතින් වදෙන් පොරෙන් කොහොම හරි සාක්ශි එකතුකරගන්න වලිකනවා.

මේ අස්සෙ තවත් එකෙක්ට බැලුමක් පුම්බන්න දුන්නම මේකා රාළහමිගෙන් අහනවලු; "ඇයි රාළහමි බැලුම් මොකටද, පොලිසියෙ උත්සවයක් වත් තියෙනවද?" කියල. මිනිහ ෆුල් ගේම දෙනවලු නයිට්‍රජන් පුරවපු බැලුම් මීටවඩා හොඳයි, ඒව ගෙනැත්දෙන්නම් කියල මාරු වෙන්න. ඔන්න ලංකාවෙ බීල වාහන එළවන ගොයියන්ගෙ වැඩ.

ඔයගොල්ල බීල වාහන එලවන්න එපා, මොකටද නිකන් පොලිසියට බැලුම් පුම්බන්නෙ?

3 comments:

  1. "හරි රාළහමි එකක් පිම්බුවොත් මාත් එකක් පුම්බනවා", // හඃ හා අන්න සිරා පොරක්.

    ReplyDelete
  2. සිරාවටම ඒ ඩයල් එක මරු. රාළහාමිගෙනුත් ගේම ඉල්ලනවානෙ.

    ReplyDelete
  3. ඔව් ඒකා බයනැති පොරක්.

    කමෙන්ටුවලට ස්තුතියි.

    ReplyDelete

බ්ලොග් එකක් සිංහලෙන් ලියන එකේ අමාරුව දන්නේ සිංහලෙන් බ්ලොග් ලියපු එකෙක්ම තමා. එහෙව් අමාරුවෙන් ලියන බ්ලොග් එක කියවල ඒකට කමෙන්ටුවක් දාන්නෙ එහෙමත් කරුණාවන්ත ඇත්තෙක් තමා. මට ඒ හැම කමෙන්ටුවක්ම රටක් වටිනව...